Тошкентда ёшлар дербиси: Қозоғистон U-21 термаси Ўзбекистонга қарши икки ўйин ўтказади
Қозоғистон U-21 терма жамоаси октябр ойида Ўзбекистон ёшлар термасига қарши икки тажриба ўйини ўтказади. KFF TEAM маълумотига кўра, икки мамлакат футбол федерациялари 12 ва 14 октябр кунлари Тошкентда ўртоқлик учрашувларини ташкил этиш бўйича келишувга эришган.
Қозоғистон ва Ўзбекистон ўртасидаги футбол тўқнашувлари турли ёш тоифаларида ҳам қизиқиш уйғотади. Бу галги баҳслар ҳам мухлислар учун кутилган дербилардан бири бўлади.
Қозоғистон ёшлар жамоаси олдинроқ, 9 октябр куни Евро-2027 саралаш доирасида Андоррага қарши сафарда майдонга тушади. Шундан сўнг, уч кун ичида уларни Тошкентда кучли рақибга қарши икки беллашув кутмоқда.
Ўзбекистонга қарши учрашувлар Қозоғистон ёшлар термаси учун жамоавий тайёргарликни баҳолаш ва навбатдаги расмий ўйинларга пухта ҳозирлик кўриш имконияти бўлади.
