Тошкентда терма жамоа ўйинлари кўчада намойиш этилади: мухлислар учун футбол фестивали ўтказилади
5-10 июн кунлари Тошкентдаги Ўзбекистон Миллий кутубхонаси олдидаги майдон мамлакатнинг асосий фан-зонасига айланади. Бу ерда катта кўчма экранлар ўрнатилиб, терма жамоанинг 2026 йилги жаҳон чемпионати саралаш босқичидаги асосий ўйинлари намойиш этилади.
Асосий намойишлар:
5 июн — БАА – Ўзбекистон ўйини (тўғридан-тўғри трансляция Абу-Дабидан)
10 июн — Ўзбекистон – Қатар ўйини (Тошкентда ўтадиган учрашув)
Ҳар икки ўйин ҳам Ўзбекистон терма жамоаси учун кейинги босқичга чиқишда ҳал қилувчи аҳамиятга эга.
Футбол кечалари турли концертлар, илҳомлантирувчи чиқишлар, тематик фаолиятлар ва интерактивлар билан бойитилади. Ташкилотчиларнинг таъкидлашича, фестивальдан кўзланган асосий мақсад — мухлисларни бирлаштириш ва ёшларни мамлакатнинг спорт ва ижтимоий ҳаётида фаол иштирок этишга илҳомлантиришдир.
