Томас Мюллер Месси ва Роналду ўртасида танлов қилди
Германия терма жамоаси собиқ ҳужумчиси Томас Мюллер Лионель Месси ва Криштиану Роналду ўртасидаги баҳсда ўз танловини маълум қилди. The Touchline тарқатган интервьюда 37 ёшли футболчи ҳозирда Мессини футбол тарихидаги энг буюк футболчи деб ҳисоблашини айтди.
Мюллернинг таъкидлашича, фаолиятининг дастлабки ўн йилида у бу баҳсда доимо Роналдуни танлаган. Бироқ вақт ўтиши билан унинг қараши ўзгарган ва умумий фаолият ҳамда ўйин услубини ҳисобга олиб, энди Мессини устун кўрмоқда. Аввалги интервьюларидан бирида ҳам немис футболчиси Мессининг ўйинини нафисроқ деб атаб, Аргентина билан жаҳон чемпионлигини қўлга киритиши унинг фикрига таъсир қилганини айтган.
Мюллер фаолияти давомида Месси ва Роналдуга қарши кўплаб муҳим учрашувларда майдонга тушган. Айниқса, унинг «Бавария» сафида Мессининг «Барселона»сига қарши Чемпионлар лигасидаги дуэллари ҳамда 2014 йилги жаҳон чемпионати финалида Аргентина устидан қозонилган ғалаба футболчининг фаолиятидаги энг йирик воқеалар қаторига киради.
Маълумот учун, Томас Мюллер ҳозирда MLS вакили «Ванкувер Уайткэпс» сафида тўп тепмоқда. Клуб яқинда германиялик футболчининг шартномасини 2027 йилги мавсум охиригача узайтирди. Мюллер «Ванкувер»га қўшилганидан бери 45 учрашувда 19 та гол уриб, 12 та голли узатма амалга оширган.
