Томас Менье «Сандерленд»га ўтишга яқин - Орнштейн

Бельгия терма жамоаси ҳимоячиси Томас Менье фаолиятини Англия Премьер-лигасида давом эттиришга яқин турибди.

Нуфузли инсайдер Девид Орнштейн хабарига кўра, 34 ёшли футболчи «Сандерленд» билан келишувга эришган ва яқин кунларда тиббий кўрикдан ўтади. Томонлар икки йиллик шартнома имзолаши кутилмоқда.

Менье ёзда «Лилль» билан шартномаси якунлангач эркин агентга айланганди. Ҳимоячига Премьер-лиганинг бошқа клубларидан ҳам таклифлар бўлган, бироқ у танловни айнан «Сандерленд» фойдасига амалга оширган.

Фаолияти давомида Томас Менье «Брюгге», ПСЖ, «Боруссия Дортмунд», «Трабзонспор» ва «Лилль» сафида тўп сурган. Шунингдек, у Бельгия терма жамоаси таркибида 80 дан ортиқ ўйин ўтказган тажрибали футболчи ҳисобланади.

Насрулло Каримов

Журналист