Тиаго Алкантара «Ливерпуль»да Андони Ираоланинг мураббийлар штабига қўшилиши мумкин
Собиқ футболчи Тиаго Алкантара «Ливерпуль» клубида Андони Ираоланинг мураббийлар штабида иш бошлаши мумкин. Бу ҳақда Mundo Deportivo нашри хабар бермоқда.
Якунланган мавсумда Тиаго «Барселона»да Ханс-Дитер Флик жамоасида фаолият юритди ва ушбу лавозимда ўзини ижобий томондан кўрсата олди. Испаниялик мутахассис Андони Ираола эса Арне Слот истеъфога чиқарилганидан сўнг «Ливерпуль» бош мураббийлигига асосий даъвогар сифатида кўрилмоқда. 43 ёшли мураббийнинг сўнгги жамоаси «Борнмут» бўлган эди ва у жорий мавсум якунлангач, клубни тарк этди. Ираола қўл остида «вишнялар» 57 очко тўплаб, турнир жадвалида олтинчи ўринни эгаллади. «Ливерпуль» эса 60 очко билан бешинчи поғонадан жой олди. Испаниялик мутахассис «Борнмут»ни 2023 йилнинг ёзидан бери бошқариб келаётган эди.
Маълумот учун, Тиаго Алкантара футболчилик фаолияти давомида «Ливерпуль», «Барселона» ва «Бавария» каби клубларда тўп сурган. Алкантара профессионал футболчилик фаолиятини 2024 йил июл ойида якунлаган эди.
