Танишинг, рақибимиз — Венгрия
Танишинг, рақибимиз — Венгрия!
Ўзбекистон миллий терма жамоаси Венгрия футзал терма жамоасига қарши иккита ўртоқлик учрашувида майдонга тушиши муносабати билан мухлисларимизга бўлажак рақибимизнинг футзалдаги тарихи ва бугунги ҳолати ҳақида қисқача маълумот берамиз.
Венгрия терма жамоаси — 1986-йилдан буён халқаро мусобақаларда иштирок этиб келади. Дастлабки учрашувини 1986-йил ноябрь ойида Перуга қарши ўтказиб, 8:3 ҳисобида ғалаба қозонган. Жамоанинг энг йирик ғалабаси 2008-йилда Англияга қарши қайд этилган — 15:0. Энг йирик мағлубияти эса 1999-йилда Испанияга қарши учрашувда кузатилган — 0:11.
Венгрия Жаҳон чемпионати финал босқичида бир марта иштирок этиб, иккинчи босқичга қадар етиб борган. УЕФА Футзал чемпионати финал босқичида эса уч марта қатнашган.
Жаҳон рейтингида Венгрия 30-ўринда турибди.
Миллий чемпионат
Венгрия Олий лигасида ҳам 12 та жамоа иштирок этади. Айни пайтда жамоалар 4-тур учрашувларини ортда қолдирган.
«Веспрем» барча ўйинларда ғалаба қозониб, 12 очко билан пешқадамлик қилмоқда. Кейинги ўринларда 7 очкодан жамғарган «Уйпешт» ва «Ньиредьхаза» жамоалари бормоқда.
Амалдаги чемпион — «Веспрем»
«Веспрем» ўтган мавсумда 22 учрашувда 59 очко жамғариб, чемпионликни қўлга киритган. «Уйпешт» 55 очко билан иккинчи, «Ньиредьхаза» эса 46 очко билан учинчи ўринни эгаллаган.
Тўпурарлар
Ўтган мавсум чемпионатнинг энг яхши тўпурари бразилиялик Родригес Эманул Жоао бўлиб, у 33 та гол урган.
«Веспрем» футболчиси Мате Сушак 28 та гол билан иккинчи, Иштван Наднажи эса 23 та гол билан учинчи натижани қайд этган.
Эртанги учрашувга Венгрия терма жамоаси таркибидан жалб этилган Золтан Салмаш, Чаба Мадяри ва Аттила Тот ҳам ўтган мавсумдаги сермаҳсул ўйинлари билан ажралиб турган.
Биринчи лига
Венгриянинг биринчи лигасида 7 та жамоа иштирок этади. Янги мавсум баҳслари шу ҳафта старт олди ва жамоалар ҳозирча 1-тур учрашувларини ўтказишди.
Ўзбекистон — Венгрия
17-сентябр | 21:30
19-сентябр | 19:00
Будаёрш, «Арамис» спорт саройи
