Таиландда фожиа: футболчи ўйин вақтида чақмоқ уриши оқибатида вафот этди
Таиландда бўлиб ўтган футбол учрашуви вақтида чақмоқ уриши оқибатида 24 ёшли футболчи Сафван Аваенинг ҳаёти фожиали тарзда якунланди.
Ҳодиса 4-август куни Наративат вилоятининг Сунгайколок туманидаги “Сантипхап” стадионида ўтказилган Golok FA Cup турнири баҳсида содир бўлган. Кучли ёмғир пайтида чақмоқ футбол майдонига уриб, бир нечта ўйинчи ерга қулагандир.
Энг оғир жароҳатни “Яла” клуби футболчиси Сафван Авае олган. Унга майдоннинг ўзида биринчи ёрдам кўрсатилиб, шифохонага олиб борилган, бироқ шифокорлар унинг ҳаётини сақлаб қола олмаган. Ҳодиса оқибатида яна тўққиз нафардан ортиқ киши жароҳат олгани маълум қилинди.
Сафван Авае 29-июль куни “Яла” билан шартнома имзолаган эди. У аввалроқ “Паттани” сафида 18 та учрашувда 7 та гол уриб, жамоанинг Таиланд иккинчи лигасига чиқишига ёрдам берган.
Таиланд футбол ассоциацияси ва “Яла” клуби марҳум футболчининг оиласи ҳамда яқинларига ҳамдардлик билдирди.
