Суперкомпьютер Португалиянинг ЖЧ-2026даги имкониятларини баҳолади
Opta Analyst ўзининг ижтимоий тармоқдаги саҳифасида суперкомпьютернинг 2026 йилги жаҳон чемпионатида Португалия миллий терма жамоаси имкониятларига оид ҳисоботини эълон қилди.
Opta маълумотларига кўра, Португалия бўлажак жаҳон биринчилигида ғолиб чиқишга асосий даъвогарлар рейтингда бешинчи ўринда бормоқда. Португалларнинг бош совринни қўлга киритиш имконияти 7 фоизга баҳоланган. Роберто Мартинес шогирдларининг финалга чиқиш эҳтимоли 13 фоизни, яримфиналга етиб бориши 23,7 фоизни, чорак финалга чиқиши эса 40,2 фоизни ташкил этмоқда.
Эътиборли жиҳати, Португалия терма жамоаси «К» гуруҳида ДР Конго, Колумбия ҳамда Ўзбекистон миллий терма жамоаси билан куч синашади.
Маълумот учун, 2026 йилги жаҳон чемпионатининг финал босқичида илк бор 48 та терма жамоа иштирок этади. Мусобақа жорий йилнинг 11 июнидан 19 июлига қадар бўлиб ўтади.
