Стефан Эль-Шаарави Италияда янги клуб топди
Италиялик ҳужумчи Стефан Эль-Шаарави фаолиятини “Женоа” клубида давом эттиришга яқин. Инсайдер Николо Скиранинг хабарига кўра, 33 ёшли футболчи Генуя клубига эркин агент сифатида қўшилиши мумкин.
Томонлар ҳозирда шартнома тафсилотларини муҳокама қилмоқда. Янги келишув 2028-йилгача мўлжалланиши кутилмоқда. Эль-Шааравининг сўнгги клуби “Рома” бўлиб, унинг римликлар билан шартномаси жорий ёзда якунига етган.
Ўтган мавсумда ҳужумчи А Серия доирасида 20 та учрашув ўтказиб, 1 та гол ва 2 та голли узатма қайд этди. Трансфер амалга ошса, Эль-Шаарави 16 йиллик танаффусдан сўнг “Женоа”га қайтади.
Маълумот учун, Эль-Шаарави айнан “Женоа” академиясида тарбия топган ва профессионал футболдаги илк қадамларини ушбу клубда қўйган. У А Сериядаги дебютини ҳам генуяликлар сафида 2008-йилда ўтказган.
