Сречко Катанец: Жамоадан катта натижа кутманг
Ўзбекистон терма жамоасининг собиқ бош мураббийи Сречко Катанец 2026 йилги жаҳон чемпионати олдидан юртдошларимизга мурожаат билан чиқди.
— Менинг ўзбек футбол мухлисларига биргина маслаҳатим бор: жамоадан ҳеч нарса кутманг. Бу сизнинг илк жаҳон чемпионатингиз. Шунчаки ҳар бир ўйиндан завқ олинг. Илк иштирокда улкан натижаларга эришиш осон эмас. Бутун жараёндан баҳра олинг. Якуний натижа кўп омилларга боғлиқ — гуруҳда қайси жамоаларга қарши ўйнаётганингиздан тортиб, бошқа минглаб сабаблар бор. Шунинг учун, асосийси — чемпионат муҳитини ҳис қилиш, — деди мутахассис.
Эслатиб ўтамиз, Жаҳон чемпионати-2026 Ўзбекистон терма жамоаси тарихидаги илк мусобақа бўлади. Дебют қатнаш футболимиз учун янги саҳифа очиб, футболчилар ва мухлислар учун жаҳон аренаси муҳитини ҳис этиш имконини яратади. Натижадан қатъи назар, мусобақада иштирок этишнинг ўзи катта ютуқ ҳисобланади ва бу келгусида футбол тараққиёти учун кучли туртки бўлиши мумкин.
