Srechko Katanec: Jamoadan katta natija kutmang
O‘zbekiston terma jamoasining sobiq bosh murabbiyi Srechko Katanec 2026 yilgi jahon chempionati oldidan yurtdoshlarimizga murojaat yo‘lladi.
— Mening o‘zbek futbol muxlislariga yagona maslahatim bor: jamoadan hech narsa kutmang. Bu sizning ilk jahon chempionatingiz. Shunchaki har bir o‘yindan zavq oling. Dastlabki ishtirokda ulkan natijalarga erishish oson emas. Butun jarayondan bahra oling. Yakuniy natija ko‘plab omillarga bog‘liq — guruhda qaysi jamoalarga qarshi o‘ynayotganingizdan tortib, minglab boshqa sabablar bor. Shuning uchun, eng muhimi — chempionat muhitini his qilish, — dedi mutaxassis.
Eslatib o‘tamiz, Jahon chempionati-2026 O‘zbekiston terma jamoasi tarixidagi ilk musobaqa bo‘ladi. Debyut ishtirok futbolimiz uchun yangi sahifa ochib, futbolchilar hamda muxlislar uchun jahon arenasi muhitini his etish imkonini yaratadi. Natijadan qat’i nazar, musobaqada ishtirok etishning o‘zi katta yutuq hisoblanadi va bu kelgusida futbol taraqqiyoti uchun kuchli turtki bo‘lishi mumkin.
