Сон Хён Мин «Соналду» лақаби ҳақида: «Бу номга лойиқ бўлиш учун ҳали етарли даражада иш қилдим деб ўйламайман»
Жанубий Корея терма жамоаси ҳужумчиси ва сардори, клуб миқёсида «Лос-Анжелес» сафида тўп сураётган Сон Хён Мин мухлислар томонидан унинг маҳорати дунёнинг энг яхши футболчиларидан бири Криштиану Роналдуга қиёсланиб берилган «Соналду» лақаби ҳақида фикр билдирди.
«Ҳозирда «Лос-Анжелес»да ўйнаяпман, у ерда мексикаликлар жуда кўп. Уларининг футболга бўлган эҳтиросини ҳис қилаяпман ва улардан кўп нарсани ўргандим. Менга жуда катта меҳр кўрсатишяпти, бундан миннатдорман. Шундай бўлса-да, ушбу лақабга лойиқ бўлиш учун ҳали етарли даражада иш қилдим деб ўйламайман», — деди Сон.
Футбол бўйича Жаҳон чемпионати 11-июндан 19-июлгача АҚШ, Канада ва Мексика майдонларида бўлиб ўтмоқда. Амалдаги жаҳон чемпиони Аргентина терма жамоаси ҳисобланади. 2022 йилги биринчилик финалида Аргентина миллий жамоаси Франция билан тўқнаш келган эди. Ўйиннинг асосий вақти 3:3 ҳисобидаги дуранг билан якунланган, бироқ пенальтилар сериясида аргентиналиклар кучлироқ чиққан эди (4:2).
