Сомалилик ҳакам Омар Артан ЖЧ-2026 турнирига киритилмагани сабабини тушунтирди
Сомалилик ҳакам Омар Абдулқодир Артан АҚШ иммиграция расмийлари мамлакатга киришни рад этгани сабабли 2026 йилги Жаҳон чемпионатида иштирок эта олмайдиган бўлди. Кўнгилсиз воқеа Майами халқаро аэропортида юз берган. Ҳакам мамлакатга дипломатик паспорт билан етиб келган бўлса-да, унинг ичкарига қўйилмагани сабаблари ошкор қилинмаган. Эслатиб ўтамиз, ЖЧ-2026 баҳслари 11 июндан 19 июлгача учта давлат — АҚШ, Канада ва Мексика майдонларида бўлиб ўтади.
«Назаримда, уларнинг менинг ватаниим билан боғлиқ муаммолари бор. Ёнимда барча зарур ҳужжатлар жойида эди. Тегишли визам ҳам бор эди. Жудаям, жудаям хафаман. Мен шунчаки ўз орзусини — ҳаётидаги энг катта орзуси бўлмиш Жаҳон чемпионатига боришни амалга оширишга уринган оддий бир ҳакамман, холос», — дея Артаннинг сўзларини келтирмоқда New York Times нашри.
Омар Абдулқодир Артан Жаҳон чемпионати финал босқичида ўйинларни бошқарадиган ҳакамлар рўйхатига киритилган илк сомалилик рефери бўлганди. Шунингдек, у 2025 йилда Африка футбол конфедерацияси талқинига кўра қитъанинг энг яхши ҳаками деб топилган эди.
Маълумот учун, Сомали фуқаролари АҚШга киришда чекловларга дуч келадиган давлатлар рўйхатида туради. Ушбу мамлакатнинг аксарият фуқаролари учун муайян тоифадаги визалар берилиши тақиқланган. Бундан фақат дипломатлар ва ташрифи АҚШ миллий манфаатларига мос келади деб топилган шахсларгина мустасно ҳисобланади.