Скалони келажаги ҳақида: «Декабргача ишлайман, кейин эса тўхташим мумкин»
Аргентина терма жамоаси бош мураббийи Лионель Скалони Жаҳон чемпионати якунланганидан сўнг ўз келажаги ҳақида фикр билдирди.
«Ҳали Лео Месси билан гаплашмадим. Аввало, федерация президенти билан учрашаман. Нима қилишимни тахминан биламан: шартномамни бажариб, декабргача ишлайман, кейин эса, эҳтимол, тўхтайман. Ростини айтсам, ҳаммасини яхшилаб ўйлаб чиқишим керак. Илгаригидек буюк натижаларга эриша оламанми-йўқми, билмайман.
Аргентина терма жамоасини бошқариш — ҳар қандай мураббийнинг орзуси. Биз мураббийлар штаби ва футболчилар билан биргаликда сўнгги дақиқагача бор кучимизни бердик. Аммо ҳозир ҳаммасини қайтадан таҳлил қилишим учун вақт керак. Ишни давом эттириш учун куч тўплаш, ўзимни қайта тиклаш ва янги жамоа қуриш лозим. Эришган ютуқларимизни такрорлаш жуда қийин бўлади. Айни пайтда мен учун бу осон эмас.
Декабргача ҳали вақт бор. Сўнгги ҳафталарда бутун эътиборимиз жаҳон чемпионати ва футболчилар ўйинини таҳлил қилишга қаратилган эди. Шунинг учун келажагим ҳақидаги масала ҳозирча на мен, на федерация учун долзарб эмас», — деди Скалони.
Матбуот анжумани давомида 48 ёшли мутахассис ҳиссиётларини жиловлай олмай, кўзларига ёш олди.
Эслатиб ўтамиз, Лионель Скалони Аргентина терма жамоасини 2018 йилдан буён бошқариб келмоқда. Унинг қўл остида жамоа 2022 йилги Жаҳон чемпионати, икки марта Америка кубоги ва Финалиссима мусобақасида ғалаба қозонган. Амалдаги шартномаси 2026 йил декабрь ойига қадар мўлжалланган.
