Симеоне Хулиан Альварес ҳақида: “Биз унинг бахтли бўлишини истаймиз”
“Атлетико” бош мураббийи Диего Симеоне ҳужумчи Хулиан Альварес атрофидаги вазиятга яна бир бор муносабат билдирди. Аргентиналик мутахассис трансфер ойнаси ёпилганидан кейин футболчининг бор эътиборини Мадрид клубидаги фаолиятига қаратиши кераклигини таъкидлади.
“Менимча, ҳаёт доимо янги имкониятларни тақдим этади. Ҳозир Хулианда ҳам шундай имконият бор. Биз кўпинча бошқаларни ҳукм қилиш билан банд бўламиз, аслида эса камроқ ҳукм қилиб, кўпроқ хулоса чиқаришни ўрганишимиз керак. Умид қиламанки, бу вазият унга сабоқ бўлади”, — деди Симеоне.
Мураббий Альвареснинг жамоада ўзини яхши ҳис қилиши “Атлетико” учун муҳим эканини ҳам қайд этди. “Биз унинг бахтли бўлишини истаймиз. Кеча Футре унга жуда чиройли видеомурожаат йўллади. Энди Хулиан ўз бахтини голлар билан кўрсатсин”, — дея қўшимча қилди Симеоне.
Маълумот учун, Альварес ёзги трансфер ойнасида “Барселона”га ўтиш истагини билдирган, бироқ “Атлетико” уни тўғридан-тўғри рақибига сотишни истамади. 26 ёшли ҳужумчининг Мадрид клуби билан амалдаги шартномаси 2030-йилгача мўлжалланган.
