Ширингина «Эвертон»: Нима учун уларни «ирислар» деб атайдилар?
Ширингина «Эвертон»: Нима учун уларни «ирислар» деб атайдилар?
Бугунги кунда биз «Эвертон»ни Англияда чемпионлик титуллари сони бўйича тўртинчи ўринда турадиган (9 марта чемпион бўлган) тарихий клуб сифатида биламиз. Уларининг расмий лақаби — «кўклар», аммо кўпинча жамоани «ирислар» (ирис конфетлари) деб аташади. Англиянинг гранд клубларидан бири учун бироз ғалати туюлиши мумкин, аммо бу номнинг тарихи жуда таъсирли.
Бу номнинг ортида ҳеч қандай яширин маъно йўқ, ҳаммаси оддий. Тарих «Ye Anciente Everton Toffee House» (ёки шунчаки «Everton Toffi») қандолат дўконидан бошланади. Дўконча «Эвертон» ўз фаолиятини бошлаган «Энфилд» стадиони яқинида жойлашган эди. Дастлаб «Сент-Доминго» деб аталган, кейинчалик «Эвертон»га айланган клуб мухлислари стадионга кетаётиб, шу дўкондан ширинликлар харид қилишни одатга айлантиришган. Бирорта ҳам мухлис бу ширинликларсиз стадионга кирмас эди.
Бу анъана 1892 йилгача, яъни «Эвертон» «Энфилд»дан «Гудисон Парк»ка кўчиб ўтгунига қадар давом этди. Машҳур ирислардан узоқлашиш мухлислар учун ҳақиқий зарба бўлди. Шундан сўнг ширинликлар учун ўзига хос кураш бошланди: «Энфилд» яқинида янги «Mother Noblett's Toffee Shop» дўкони очилди. Уддабурон тадбиркорлар ғояни кўчириб, оқ шакарли йўл-йўл шаклдаги янги конфетларни ишлаб чиқаришди (бу конфетлар ҳалигача «Эвертон» мухлислари орасида машҳур).
Бироқ, машҳур ирисларнинг асл рецептини яратган Молли Бушелл бунга жим қараб тура олмади. У «Гудисон Парк» стадионининг ичида ўз конфетларини расман сотиш ҳуқуқини қўлга киритди ва шундан бери бу ширинлик «Эвертон»нинг ажралмас қисмига айланди.
Замонавий анъана
Бугунги кунда «Эвертон»нинг ҳар бир уй ўйинида — ўйиндан олдин, танфусда ва ундан кейин стадиондаги мухлисларга бепул ирис конфетлари тарқатилади. Бунинг учун ёш қиз мухлиса танлаб олинади, унга узун кўк кўйлак ва оқ шляпа кийдирилади. Унинг қўлида «Эвертон» конфетлари солинган саватча бўлади. Бу анъана 18-аср охирида «Эвертон» ирислари рецептини яратган ўша машҳур «ирислар хоними» — Молли Бушеллга бағишланган.
Айтишларича, ҳатто қиролича Виктория ва машҳур ёзувчи Чарльз Диккенс ҳам айнан унинг ирисларини татиб кўриш учун махсус Эвертонга (Ливерпул шаҳрининг бир қисми) ташриф буюришган экан!
