Шешко Аморим «МЮ»дан кетганидан сўнг икки ўйинда ярим мавсумдагига қараганда кўпроқ гол урди
«Манчестер Юнайтед» ҳужумчиси Бенжамин Шешко Англия Кубоги учинчи раундида «Брайтон»га қарши ўйинда (1:2) гол урди. Шу тариқа, словениялик футболчи Рубен Аморим истеъфога чиққанидан кейинги икки учрашувда учинчи голини нишонлади. Бу кўрсаткич унинг мавсумнинг аввалги қисмидаги натижасидан ҳам юқори.
Аввалроқ Шешко «Бёрнли»га қарши баҳсда (2:2) дубль муаллифига айланганди. Жорий мавсумда ҳужумчи клуб сафида барча мусобақаларда 19 та ўйинда майдонга тушиб, 5 та гол ва 1 та голли узатма амалга оширди.
Словения терма жамоаси аъзоси 2025 йил ёзида «Манчестер Юнайтед»га «РБ Лейпциг»дан 85 млн евро эвазига кўчиб ўтганди. Ушбу суммага 76,5 млн евро — кафолатланган тўловлар, 8,5 млн евро — бонуслар киради. Футболчи билан тузилган шартнома 2030 йил июнигача амал қилади.
