Шаҳзодбек Ғофурбеков: «Қийин ўйин ўтказдик. БухДУни енгишга ҳаракат қиламиз»
Биринчи лига 6-туридан ўрин олган «Гулистон» — «Сирдарё ФА» ўйинидан сўнг мезбонлар етакчи футболчиларидан бири Шаҳзодбек Ғофурбеков ўз фикрларини билдирди.
«Аввало, бу ўйинда бизни стадиондан туриб қўллаб-қувватлаган барча мухлисларимизга миннатдорчилик билдирамиз. Ўйин бироз қийин кечди. Шунга қарамай, ғалаба учун майдонга чиққан эдик. Кўриб турибсизларки, мақсадимизга эришиб, уч очкога эга бўлдик. Барчамиз бундан хурсандмиз.
Биринчи бўлимда ҳаммаси жойида бўлди. Фақат ҳаво ҳароратининг бироз иссиқлик қилгани футболчиларга таъсир қилди. Лекин ижобий натижа учун ҳаракат қилдик.
«Нефтчи»га қарши баҳсдаги чарчоқлар сезилгани йўқ. Гарчи қийин ўйинни ўтказган бўлишимизга қарамай, камчиликларимизни кўриб олдик. Машғулотларда нималарга кўпроқ эътибор қаратиш лозимлигини билиб олдик.
БухДУ билан ҳам қийин ўйин бўлади. Ҳар ҳолда жамоа Про лига иштирокчиси ҳисобланади. Бор кучимизни сарфлаб, ғалаба қозониш учун ҳаракат қиламиз. Ўйлайманки, мухлисларимизни бўлажак баҳсда қувонтира оламиз», — деди Ғофурбеков.
