Сергей Ташуев: «Бундай ўйин ҳаммага фойдали»
“Андижон” ҳамда Россиянинг “Енисей” (1:1) жамоалари ўртасидаги ўртоқлик учрашувидан кейин рақиб жамоа бош мураббийи Сергей Ташуев “Андижон” матбуот хизмати учун фикрларини билдириб ўтди.
- Ўйин ҳақида фикрингиз қандай?
- Яхши спарринг. Рақиб таркибида маҳаллий ва хорижлик футболчилар борлиги ўйиннинг қизғин ўтишига сабаб бўлди.
- Бир сўз билан айтганда, “Андижон” сизда қандай таассурот қолдира олди?
- Юқорида айтганимдек, таркиб яхши ва шунга мос равишда баҳсимиз анча қизғин кечди. Аммо футболда ўсишнинг чегараси бўлмайди. Шунақа назорат беллашувлари орқали мураббийлар қайси жиҳатларга урғу беришни билиб олишади.
- Ўйиндан кўнглингиз тўлдими?
- Умумий маънода сўраяпсизми ё жамоамнинг ўйини тўғрисидами?
- Умумий маънода...
- Албатта, кўнглим тўлди. Қизиқарли ва курашларга бой тўқнашув гувоҳига айландик. Бундай ўйин ҳаммага фойдали. Бинобарин, таркибдаги ёш футболчилар учун роса асқотади.
- Жамоамиздаги қайси футболчилар сизда яхши таассурот қолдира олишди?
- Ўйинчиларингизнинг исм-шарифларини билмайман. Менга кўпроқ ҳужум чизиғининг ўнг қанотидаги футболчингиз маъқул келди. Аммо, ростини айтсам, беллашув давомида бутун эътиборим шогирдларимда бўлди.
