Sergey Tashuev: «Bunday o'yin hammaga foydali»
“Andijon” hamda Rossiyaning “Yenisey” (1:1) jamolari o'rtasidagi o'rtoqlik uchrashuvidan keyin raqib jamoa bosh murabbiyi Sergey Tashuev “Andijon” matbuot xizmati uchun fikrlarini bildirdib o'tdi.
- O'yin haqida fikringiz qanday?
- Yaxshi sparring. Raqib tarkibida mahalliy va xorijlik futbolchilar borligi o'yinning qizg'in o'tishiga sabab bo'ldi.
- Bir so'z bilan aytganda, “Andijon” sizda qanday taassurot qoldira oldi?
- Yuqorida aytib o'tganimdek, tarkib yaxshi va shunga mos ravishda bahsimiz ancha qizg'in kechdi. Ammo futbolda o'sishning chegarasi bo'lmaydi. Shunaqa nazorat bellashuvlari orqali murabbiylar qaysi jihatlarga urg'u berishni bilib olishadi.
- O'yindan ko'nglingiz to'ldimi?
- Umumiy ma'noda so'rayapsizmi yo jamoamning o'yini to'g'risidami?
- Umumiy ma'noda...
- Albatta, ko'nglim to'ldi. Qiziqarli va kurashlarga boy to'qnashuv guvohiga aylandik. Bunday o'yin hammaga foydali. Binobarin, tarkibdagi yosh futbolchilar uchun rosa asqotadi.
- Jamoamizdagi qaysi futbolchilar sizda yaxshi taassurot qoldira olishdi?
- O'yinchilaringizning ism-shariflarini bilmayman. Menga ko'proq hujum chizig'ining o'ng qanotidagi futbolchingiz ma'qul keldi. Ammo, rostini aytsam, bellashuv davomida butun e'tiborim shogirdlarimda bo'ldi.
