Сергей Лушчан: «Мавсум охирига келиб фақат ёшлар жамоамизда бўлади»
Суперлига 24-турдан ўрин олган "Машал" – ОКМК учрашувидан сўнг "Машал" бош мураббийи Сергей Лушчан матбуот анжуманида иштирок этди.
- Ўйин ҳақида фикрингиз?
- Рўй бериши керак бўлган воқеа содир бўлди. Йигитлар қўлдан келганча ҳаракат қилишди. Юзага келган хато қимматга тушди. Ғалаба билан рақибни табриклайман. Бошқа ҳеч нарса дея олмайман.
- Бугун икки нафар ёш футболчи жамоангизда дебют қилди.
- Деярли ҳар ўйинда кимдир дебют қиляпти. Биз секин-аста жамоани ёшартириб боряпмиз, мавсум охирига келиб фақат ёшлар жамоамизда бўлади. Кейинги учрашувда яна икки нафар футболчини У-21дан чақиришимиз мумкин.
- Шартномангиз йил охиригача тузилган. Жамоада қолиб ёшлар билан ишлашда давом этасизми?
- Клуб раҳбарияти ишонч билдирса вазият шунга қараб кетяпти. Олдимизга иккита вазифа қўйилганди. Биринчиси, имкон қадар Суперлигада қолиш, иккинчиси жамоани ёшартириш. Ўринбосарлар тўлиқ биз билан шуғулланяпти. Машғулотларда 30 нафар футболчи қатнашяпти. Шулардан энг яхшиларини ўйинга ажратиб оламиз. Кимнинг нимага лойиқ эканлигини кузатиб боряпмиз. Бизда икки нафар У-19дан ҳам ўйинчи бор. Агар Суперлигада қолсак, барибир тажрибали футболчиларни ҳам таклиф этамиз. Бу йил клубларга оғир бўляпти, бюджетдан пул ажратилиши биринчи марта кузатилди ва одамлар 6-7 ойлаб маошсиз қолишди. Клубда молиялаштириш бўлса, жамоа ҳам бўлади.
