“Сўғдиёна” қийин аҳволда: Бошкович тақдири сўроқ остида
Термезда бўлиб ўтган Суперлиганинг 10-туридан ўрин олган “Сурхон” – “Сўғдиёна” учрашуви кутилганидек шиддатли ва драматик тарзда ўтди. Турнир жадвали пастки қисмида жойлашган икки жамоанинг тўқнашуви термезликларнинг 2:1 ҳисобидаги ғалабаси билан якунланди.
Бошкович масаласи – кун тартибидаги асосий мавзу
Учрашув олдидан “Сўғдиёна” бош мураббийи Иван Бошкович учун бу ўйин ҳал қилувчи бўлиши мумкинлиги ҳақида фаол муҳокамалар юрганди. Энди эса бу гап-сўзлар янада кучайди. Жамоа яхши таркибга эга бўлишига қарамай, натижалар қониқарли эмас ва очколар кетма-кет йўқотилмоқда.
Бошкович 2023 йилдан буён жамоага раҳбарлик қилиб келмоқда ва аввалги мавсумларда муносиб кўрсаткичлар қайд этган. Аммо жорий мавсумда унинг режалари амалга ошмаяпти. “Шўртан”га қарши учрашувда ҳам жамоа омадсиз ўйин намойиш этганди. Термездаги мағлубият эса клуб раҳбарияти ва мухлислар сабрини синовга солмоқда.
Маҳаллий манбаларга кўра, клуб Бошкович ўрнига бир неча номзодни кўриб чиқмоқда. Улар орасида яқинда “Андижон”ни тарк этган Александр Хомяков ҳам бор.