Саудия Арабистони Мессини ўз чемпионатида кўришни хоҳламоқда
Саудия Арабистонининг Жамоатчилик инвестиция жамғармаси аргентиналик ҳужумчи Лионел Месси билан аввалги музокараларни бошлади. У ҳозирда АҚШнинг «Интер Майами» клуби ва Аргентина терма жамоасида тўп сурмоқда.
TEAMtalk нашри хабарига кўра, Мессининг мамлакатнинг етакчи тўрт клубидан бирига ўтиши муҳокама қилинмоқда — «Ал-Аҳли», «Ал-Ҳилол», «Ал-Иттиҳод» ёки «Ан-Наср». Лойиҳанинг асосий мақсади — Мессини Криштиану Роналду қаторида лиганинг юзига айлантириш. Роналду бугунги кунда «Ан-Наср» сафида ҳаракат қилмоқда.
Айни пайтда музокаралар дастлабки босқичда. Агар футболчи Саудияга кўчишга розилик билдирса, келишув шартларини муҳокама қилишга ўтилади.
Месси 2021 йилгача «Барселона»да тўп сурган, кейин икки мавсум Франциянинг ПСЖ жамоасида ўйнаган. 2023 йилдан буён у АҚШнинг MLS лигасидаги «Интер Майами» клубини шарафламоқда.
