Сардор Азмун Эрон терма жамоасига қайтди — олдинда Ўзбекистон билан ўйин
Эрон терма жамоаси ҳужумчиси Сардор Азмун миллий жамоага қайтди. 31 ёшли футболчи ЖЧ-2026дан кейинги илк йиғин учун Амир Ғаленоий томонидан терма жамоага чақирилди. У Ўзбекистон ва Россияга қарши ўртоқлик учрашувларида иштирок этиши мумкин. Бу ҳақда Reuters хабар бермоқда.
Азмун ЖЧ-2026 учун Эрон таркибига киритилмаган эди. Энди эса тажрибали ҳужумчи яна миллий жамоа сафида. Футболчининг ўзи қайтишидан хурсанд эканини билдириб, терма жамоага нисбатан ҳеч қандай хафагарчилиги йўқлигини таъкидлади.
Эроннинг навбатдаги учрашуви айнан Ўзбекистонга қарши бўлади. Баҳс 24-сентябр куни Фарғонадаги “Истиқлол” стадионида ўтказилади. Шундан сўнг эронликлар 29-сентябр куни Россияга қарши майдонга тушади.
Маълумот учун, Сардор Азмун Эрон терма жамоаси сафида 91 та учрашувда 57 та гол урган ва мамлакат тарихидаги энг сермаҳсул футболчилардан бири ҳисобланади. Ҳозирда у БААнинг “Шабаб Ал-Аҳли” клубида тўп тепмоқда.
