«Сантьяго Бернабеу» NFL ўйинига мезбонлик қилади
Мадриднинг «Реал» клуби Миллий футбол лигаси (NFL) билан ҳамкорлик келишувини узайтирди. Унга кўра, «қироллик клуби»нинг муҳташам «Сантьяго Бернабеу» стадиони ушбу нуфузли мусобақанинг яна бир учрашувига мезбонлик қилади. Бу ҳақда COPE нашри журналисти Мигел Анхель Диас ўзининг «X» (собиқ Twitter) ижтимоий тармоғидаги саҳифасида маълум қилди.
Навбатдаги йирик ўйин 2026 йилнинг октябрь ёки ноябрь ойларида ўтказилиши режалаштирилган.
Эслатиб ўтамиз, 2025 йилнинг 16 ноябр куни «Сантьяго Бернабеу» стадиони ўз тарихида илк бор NFL ўйинини қабул қилган эди. Ўшанда Мадрид майдонида «Вашингтон Коммандерс» ҳамда «Майами Долфинс» жамоалари тўқнаш келишганди.
Шунингдек, «қаймоқранглилар»нинг ички чемпионатдаги ҳолатига назар ташласак, Испания Ла Лигасининг 21-туридан сўнг мадридликлар 51 очко жамғарган ҳолда, турнир жадвалида ҳозирча иккинчи ўринда бормоқдалар.
