“Сан-Сиро” стадиони 100 ёшга тўлди
Италиянинг энг машҳур футбол ареналаридан бири — “Сан-Сиро” стадиони бугун, 19-сентябрь куни 100 йиллигини нишонламоқда. Милан шаҳридаги стадион 1926 йил 19 сентябрда расман очилган ва ўша кундан буён жаҳон футболидаги энг рамзий ареналардан бирига айланган. “Интер” ва “Милан” клублари юбилей муносабати билан махсус материаллар эълон қилди.
Стадионнинг очилиш учрашувида “Милан” ва “Интер” ўзаро тўқнаш келган. Тарихий дерби “Интер”нинг 6:3 ҳисобидаги ғалабаси билан якунланган. Аренани қуриш ташаббуси ўша пайтдаги “Милан” президенти Пьеро Пиреллига тегишли бўлиб, дастлаб стадион айнан “россонерилар”нинг уй майдони сифатида барпо этилган.
Кейинчалик “Интер” ҳам “Сан-Сиро”дан уй стадиони сифатида фойдалана бошлади. Арена йиллар давомида бир неча бор кенгайтирилди ва реконструкция қилинди. Бу ерда жаҳон чемпионатлари, Европа кубокларининг тарихий учрашувлари, Милан дербилари, шунингдек, йирик концерт ва халқаро тадбирлар ўтказилган.
Маълумот учун, стадионнинг расмий номи “Stadio Giuseppe Meazza” бўлса-да, футбол оламида у ҳамон “Сан-Сиро” номи билан машҳур. 100 йил давомида арена “Милан” ва “Интер” тарихидаги кўплаб унутилмас воқеаларга мезбонлик қилган.
