“Сан-Паулу”нинг 19 ёшли футболчиси ҳалокатли ЙТҲ бўйича тергов қилинмоқда
Бразилиянинг “Сан-Паулу” клуби чап қанот ҳимоячиси Николас Босшардт Баруэри шаҳрида юз берган йўл-транспорт ҳодисасига алоқадор бўлиб қолди. 19 ёшли футболчи бошқарган автомобиль йўлни кесиб ўтаётган 84 ёшли эркакни уриб юборган. Жабрланувчи ҳодиса оқибатида вафот этган.
Ҳодиса ортидан Босшардт вақтинча қўлга олинган, бироқ суд мажлисидан кейин тергов давомида озодликда қолиш ҳуқуқини олган. “Сан-Паулу” баёнотига кўра, футболчи воқеа жойини тарк этмаган, тез ёрдам хизматига мурожаат қилган ва кейинчалик полиция бўлимига бориб кўрсатма берган. Текширув унинг спиртли ичимлик истеъмол қилмаганини ҳамда ҳайдовчилик гувоҳномаси амалда бўлганини кўрсатган.
Полиция ҳодисадан аввал футболчи ноқонуний автомобиль пойгасида қатнашган бўлиши мумкинлиги ҳақидаги тахминни ҳам текширмоқда. Гувоҳлардан бири автомобиллар катта тезликда ҳаракатланганини билдирган. Бироқ Босшардт бу айбловни рад этиб, машинаси тахминан соатига 50 километр тезликда бошқарганини маълум қилган.
“Сан-Паулу” марҳумнинг яқинларига ҳамдардлик билдириб, клубнинг юридик бўлими ишнинг боришини кузатиб боришини маълум қилди. Босшардт клуб академиясининг истиқболли тарбияланувчиларидан бири ҳисобланади. Ҳодисанинг футболчининг кейинги фаолиятига қандай таъсир қилиши тергов ва суд жараёни якунларига боғлиқ бўлади.
