Рўзиқул Бердиев: \"Қашқадарёда улардан қолишмайдиган мухлислар бор!\" (тўлиқ матбуот анжумани)
Бир неча соатлардан сўнг, Ўзбекистон Суперкубоги доирасидаги “Насаф”-"Андижон" қарама-қаршилиги бўлиб ўтади. Ушбу ўйин олдидан “аждарлар” бош мураббийи Рўзиқул Бердиев матбуот анжуманида иштирок этди:
"Ассалому алайкум барчага. Ўйлайманки, эртанги ўйин ажойиб муҳитда бўлади. Мухлислар томонидан ҳақиқий байрам бўлади деб ўйлайман. Ўйинга келадиган бўлсак, учрашув битта ўйиндан иборат ва кескин курашларга бой тарзда бўлади. Кубокни қўлга киритишни жуда ҳам хоҳлаймиз. Шуга яраша тайёргарлик кўрдик. Йигитларни кайфияти аъло даражада. Биз эртанги ўйинга тайёрмиз.
Муҳаммадиев ҳозирги ёшлардан ҳам тезроқ югурадиган ўйинчи ҳисобланади. Тўғри, баъзи бир футболчиларимизда тезлик йўқдир, лекин тажриба анча юқори. Ҳозир Суперкубок баҳсида турибмиз, қолаверса жамоамиз Ўзбекистон чемпионатида биринчи ўринда кетяпти. Манимча муҳокама қилинадиган жойи йўқ. Ҳар бир жамоада камчиликлар бўлиб туради. Бу масалаларни тузатишимиз керак. Эътибор берсангиз, агар жамоа ҳимояда оқсайдиган бўлса натижалар бу даражада бўлмас эди. Ҳозирги йигитларимизнинг ҳимояда кўрсатаётган ўйини бизни қониқтириб турибди.
Шацкихга ютқазмаганим бу энди статистика. Бу ўтган йили ҳам таъкидлашган эди. “Пахтакор” билан Суперкубокда ҳам яхши натижа қилганмиз. Бу бошқа ўйин, Максим бошқа жамоа билан қатнашяпти. Албатта статистикамни яхшилашга ҳаракат қиламан, лекин биласизлар ўзимдан кўра жамоанинг манфаати биринчи ўринда туради. Бундай ўйинга жиддий ёндашамиз.
Ўтган йилги натижалар такрорланаётгандек. Ўтган йили ҳам кубокдан чиқиб кетиб, қайсидир даврда ёмон ўйин кўрсатганмиз ва Суперкубокни қўлга киритган эдик. Кубокдан чиқиб кетдик. Ортга қараш шарт эмас, олдинга интилиш керак. Олдимизда чемпионат баҳслари ва Суперкубок ўйини бор. Кубокдан чиқиб кетганимиздаги ўйиндан кейин бизнинг мақсадимиз бошқа деб айтгандим. Ўйлайманки, эртанги ўйин бошқача бўлади.
Шерзод бизнинг етакчи ўйинчиларимиздан бири ҳисобланади. Уни захирада қолиб кетиши ёки умуман қайдномаға ҳам киритилмагани биринчи навбатда жароҳати сабабли бўлди, қолаверса у бетоб ҳам бўлиб қолди. Шунинг учун таркибга ҳам, ўйинга ҳам жалб қилинмади. Эртанга ўйинга у ҳам тайёргарлик кўрмоқда. Имкон қадар ундан фойдаланишга ҳаракат қиламиз.
Ўз мақсадимиз бор. Эртанги кубокка бўлган эътибор биринчи даражага чиқади. Футболчиларни терма жамоага жароҳат олиб боришини албатта хоҳламаймиз, лекин ўйинчилар ҳам бу ўйинни қанчалик муҳим эканлигини тушуниб туришибди. Тўлиқ кучдан фойдаланамиз ва йигитлар борини бериб ҳаракат қилишади.
Бизда пеналти тепадиганлар яна ҳам кўпайди. Биласиз, ўтган йили ҳам пеналти тепишда маҳорат кўрсатган эдик. Ўйлайманки, бу вазиятгача борсак бизда муаммо бўлмайди. Футболчиларга ишонамиз. Кечаги машғулотларда ҳам бу устида ишладик, мусобақа ўйнадик ва яхши кайфиятда тайёргарлик кўрдик.
Ҳаммамиз яхши биламиз, “Андижон”ни кучли томонларидан бири бу уларнинг мухлислари ҳисобланади. Ўйлайманки, Қашқадарёда улардан кам бўлмаган мухлислар бор. Гапимни бошида айтдим, эртага ажойиб муҳит бўлади. Икки жамоа мухлислари бизга байрам муҳитини яратиб беради деб ўйлайман.
Суперкубок бир ўйиндан иборат. “Андижон” балки барқарор бўлмагандир, лекин шундай ўйинлари бўлдики, яхши таассурот қолдирди. “Пахтакор”, “ОКМК” ёки биз билан ўтказган ўйинларини бунга мисол қилиб келтириш мумкин. Шунинг учун ҳам рақибга жиддий муносабатда бўляпмиз.
Чераннинг маҳоратига шубҳа йўқ. Таклиф қилганимизда унинг қобилиятини чамалап бўлганмиз. Бизда ҳам, “Пахтакор”да ҳам ўзини яхши томонлама кўрсатди. Черан каби иқтидорли футболчилар чемпионатимизда кам. Биз ҳозир эслдик, Черан Суперкубокларда бизга иккита гол урган экан, булар Самарқанддаги ҳамда Яйпандаги баҳсларда. Ундан кейин биз икки марта Суперкубокни қўлга киритдик. Черанга учинчисида бизга ёрдам берасан деб айтдим. Бизга унинг кўп югуриши шарт эмас. Унинг етакчилик қобилияти бизга ас қотади",-дейди мутахассис.
