Рустамов: «Юзага келган вазиятлардан фойдаланганимизда 3-4та тўп фарқи билан ютишимиз мумкин эди»
Суперлига 20-туридан ўрин олган «Қизилқум» - «Бунёдкор» (1:1) учрашувидан сўнг мезбонлар бош мураббийи Акмал Рустамов ўз фикрларини билдирди.
«Ўйин қийин ўтишини билардик. Ўтган тур «Хоразм»га қарши сунъий майдонда тўп тепганимиздан сўнг табиий майдонга ўтиш озроқ қийинчилик туғдирди. Шунга қарамай йигитлар бор куч билан ҳаракат қилишгани учун раҳмат айтмоқчиман. Агар яратилган вазиятлардан фойдаланганимизда 3-4та тўп фарқи билан ютишимиз мумкин эди. Лекин яратилган голга айланмади ва натижада бир очкодан бўлишиб олдик.
- Энди Суперлигада танаффус юзага келди. Бу оралиқда жамоанинг режалари қандай?
- Биз аллақачон режа ишлаб чиққанмиз. Уч-тўрт кун футболчиларга дам бериб шундан сўнг яна Навоий шаҳрида йиғиламиз. Ўртоқлик учрашувларини ҳам гаплашиб қўйганмиз. Навоийда битта, Тошкентда иккита назорат баҳси ўтказишни мақсад қилганмиз. Буёғига бўшашига умуман ҳаққимиз йўқ. Танаффусдан кейин ўзимизни кўрсатиб жадвалнинг юқори қисмига чиқишга ҳаракат қиламиз.
- «Бунёдкор»га қарши таркибни Хоразмдаги ўйиндан кейин келиб чиққан ҳолда аниқладингизми? Чунки Ислом Кенжабоев билан Шоҳруз Норхонов захирада қолди.
- Ким ўйинга юз фоиз тайёр бўлса, шу футболчиларни асосий таркибда туширдик. Биз ҳар бир ўйинга режа бўйича тайёргарлик олиб борамиз.
- Захирадан майдонга тушган Бобомурод Бозоровнинг ўйини ҳақида фикрингиз?
- Бобомурод жамоамиз ўйинини кучайтирди. Биз бундан кейин ҳам навоийлик ёшларга имкон беришда давом этамиз. Аслида бир масалага тўхталмоқчи эмасдим-у, лекин тўхталишга мажбурман. «Сурхон» билан ўйинда ҳакамлар иккита пеналтини қўймади. Бугун эса тоза голимизни бекор қилишди. Буларни гапирмоқчи эмасдим, лекин ичимизда сақлаб ҳам бўлмаяпти. Гапирмаса бўлмайдиган ҳолатга келиб қолдик. «Сурхон» билан баҳсда ғалаба қозонишимиз керак эди. «Андижон»га қарши учрашувда ҳам голимизни ҳисоблашмади. Ҳакамлар билан ишлайдиган юқори ташкилот бор, мана шу ўйинларни кўриб чиқишларини сўрайман. Бунга яна қанча чидаш мумкин билмайман», - деди Рустамов.
