Руни Ван Дейк ва Салоҳни танқид қилди
«Манчестер Юнайтед» ва Англия миллий жамоаси собиқ футболчиси Уэйн Руни «Ливерпул» ҳимоячиси Виржил ван Дейк ва ҳужумчи Муҳаммад Салоҳнинг жорий мавсумдаги ўйини ҳақида фикр билдирди.
«Ҳозир мураббий ва жамоа етакчилари жуда тез ечим топиши керак. Ван Дейк ҳам, Салоҳ ҳам янги шартнома имзолашган, аммо менимча, бу мавсумда улар жамоани ортидан эргаштира олаётгани йўқ.
Улар клубдаги энг кучли икки ўйинчи, лекин агар уларнинг ўйини кутилган даражада бўлмаса, бу бутун жамоага таъсир қилади. Балки хатолик қилаётгандирман, лекин агар мен «Ливерпул» мухлиси ёки мураббийи бўлганимда, бу ҳолат мени жиддий ташвишга солган бўларди», — деди Руни.
Маълумот учун, «Ливерпул» Англия Премьер-лигасининг 9-туридан сўнг 15 очко жамғарган ҳолда турнир жадвалида 7-ўринда бормоқда.
