Руни: “Манчестер Сити”дан олиб қўйилган чемпионлик медали менга керак эмас”
“Манчестер Юнайтед” афсонаси Уэйн Руни “Манчестер Сити” 2011/12-йилги Англия Премьер-лигаси чемпионлигидан маҳрум қилинадиган бўлса ҳам, ушбу титулнинг собиқ клубига берилишини шахсий ютуқ сифатида қабул қилмаслигини айтди. Англиялик собиқ ҳужумчи ўша мавсумдаги чемпионлик медалини олишни истамаслигини очиқ билдирди. Бу ҳақда The Sun нашри хабар бермоқда.
Манбага кўра, Руни “Манчестер Юнайтед” ўша мавсумда чемпионлик учун етарлича яхши ўйнамаганини таъкидлаган. Унинг фикрича, жамоа мавсум якунига бир неча тур қолганида катта устунликка эга бўла туриб, вазиятни қўлдан чиқариб юборган. Шу сабабли у йиллар ўтиб бериладиган чемпионлик медалини қабул қилиш ўзига ноқулай бўлишини айтган.
Шу билан бирга, Руни “Манчестер Сити” молиявий қоидабузарликлар сабаб айрим титулларидан маҳрум қилиниши мумкинлигини инкор этмади. Бу масалада унинг фикри собиқ жамоадоши Рио Фердинандникидан фарқ қилади: Фердинанд аввалроқ 2011/12-йилги чемпионлик “Манчестер Юнайтед”га берилса, яна бир АПЛ медалини олишга тайёр эканини билдирган эди.
Маълумот учун, 2011/12-йилги мавсумда “Манчестер Сити” ва “Манчестер Юнайтед” 89 очкодан жамғарган, бироқ Роберто Манчини жамоаси тўплар нисбатидаги устунлик эвазига чемпион бўлган. Уэйн Руни эса “Манчестер Юнайтед” сафида жами 5 марта Премьер-лига чемпионлигини қўлга киритган.
