Руди Гарсия Бельгия терма жамоасини тарк этади
Бельгия Қироллик футбол ассоциацияси терма жамоа бош мураббийи Руди Гарсия билан ҳамкорликни давом эттирмасликка қарор қилди.
Томонлар 2026-йил 31-июлда якунланадиган шартномани узайтирмайди. Шу тариқа, франциялик мутахассис амалдаги келишув муддати тугагач, Бельгия терма жамоасидаги фаолиятини якунлайди.
Руди Гарсия 2025-йил 1-феврал куни Доменико Тедеско ўрнига Бельгия терма жамоаси бош мураббийи этиб тайинланган эди. Унинг қўл остида бельгияликлар УЕФА Миллатлар лигасининг “A” дивизионидаги ўрнини сақлаб қолди ҳамда 2026-йилги Жаҳон чемпионатига йўлланма олди.
Бельгия терма жамоаси ЖЧ-2026да чорак финалгача етиб борди. Ушбу босқичда жамоа кейинчалик турнир ғолиби бўлган Испанияга 1:2 ҳисобида мағлуб бўлди.
Аввалроқ Бельгия терма жамоасининг янги бош мураббийи лавозимига Марк ван Боммел асосий номзод сифатида кўрилаётгани ҳақида хабар берилганди.
