Роналдусиз Португалия FIFA рейтингининг топ-5'лигига кўтарилди
Португалия миллий терма жамоаси FIFAнинг жонли рейтингида икки поғона юқорилаб, еттинчи ўриндан бешинчи ўринга кўтарилди. Жорже Жезуш бошчилигидаги жамоа Криштиану Роналду терма жамоа қароргоҳини тарк этганидан кейин ҳам муваффақиятли натижалар қайд этиб, кучли бешликка киришга муваффақ бўлди. Бу ҳақда FIFA расмий сайти маълумот бермоқда.
Манбага кўра, Португалиянинг кўтарилиши натижасида Бразилия олтинчи ўринга тушган, Марокаш эса еттинчи поғонага қайтган. Аввалроқ Марокаш олтинчи ўриндан бешинчи ўринга кўтарилиб, Бразилияни ортда қолдирган эди, бироқ сўнгги халқаро учрашувлардан кейинги ҳисоб-китоблар рейтингдаги вазиятни яна ўзгартирди.
Португалия жорий халқаро танаффусда Данияни 4:2, Норвегияни эса 2:1 ҳисобида мағлуб этди. Норвегия устидан қозонилган ғалаба португалияликларга UEFA Миллатлар лигаси чорак финалига муддатидан аввал йўлланма олиш имконини берди. Жамоа бу учрашувларни Роналду иштирокисиз ўтказди.
Маълумот учун, FIFA рейтингининг навбатдаги расмий янгиланиши 7-октабр куни эълон қилинади. Ҳозирги жонли ҳисоб-китобда кучли тўртликдан Испания, Аргентина, Франция ва Англия жой олган, Португалия эса бешинчи поғонага кўтарилган.
