Роналдунинг фитнес-браслети унинг биологик ёши 29 ёш эканини кўрсатди
Португалия футболининг афсонавий юлдузи Криштиану Роналду ҳозирги жисмоний ҳолати ҳақида сўз юритиб, яна камида 10 йил футбол ўйнаши мумкинлигини айтди. 40 ёшли “Ал-Наср” ҳужумчиси бу фикрни фитнес-технологиялар соҳасидаги Whoop компанияси подкастида билдирди. Ушбу компания соғлиқни мониторинг қилишга ихтисослашган замонавий фитнес-трекерлар ишлаб чиқаради.
Подкаст давомида Роналдунинг физиологик ҳолатига оид маълумотлар таҳлил қилинди — юрак уриши, ритмдаги ўзгаришлар, тикланиш, юклама ва уйқу сифатидан иборат 140 дан ортиқ кўрсаткич кўриб чиқилди. Whoop браслети унинг биологик ёши 28,9 ёш эканини аниқлаган.
“Бу натижага ўзим ҳам ишонмадим… 28,9 ёш! Демак, мен яна 10 йил футбол ўйнашим мумкин”, — деди Whoop бренди амбассадори бўлган Роналду.
Компания вакилларининг таъкидлашича, ушбу фитнес-браслет профессионал спортчилар учун мўлжалланган бўлиб, организмнинг ҳар томонлама ҳолатини аниқ баҳолаш имконини беради.
