Роналду Жезуш билан можародан сўнг Португалия терма жамоасидаги фаолиятини якунлаши мумкин — Marca
Португалия терма жамоаси ҳужумчиси Криштиану Роналду бош мураббий Жорже Жезуш билан юз берган можародан сўнг миллий жамоадаги фаолиятини якунлаши мумкин. Бу ҳақда Marca хабар берди.
1 октябрь, пайшанба куни Португалия Миллатлар лигаси (А лига) 3-турида Данияга қарши майдонга тушади. Учрашув Даниянинг Копенгаген шаҳридаги «Паркен» стадионида бўлиб ўтади.
Қайд этилишича, вазият шу қадар кескинлашганки, Роналдунинг миллий терма жамоадаги келажаги жиддий шубҳа остида қолган.
Аввалроқ футболчи бош мураббий Жорже Жезуш можаро йўқлигини таъкидлаганига қарамай, терма жамоа машғулотини тарк этгани хабар қилинган эди. Шунингдек, Роналду яқин соатлар ичида Копенгагендан учиб кетиши кутилмоқда.
Жезуш ҳам матбуот анжуманида Роналдунинг данияликларга қарши учрашувда майдонга тушмаслиги мумкинлигини маълум қилган.
Португалия терма жамоаси Миллатлар лигасида иккита учрашув ўтказди. Роналду Уэльсга қарши баҳсда (1:0) 67 дақиқа майдонда ҳаракат қилди, аммо самарали ҳаракат билан ажралиб турмади.
Норвегияга қарши ўйинда (2:1) эса футболчи майдонга тушмади. Бу ҳолат Роналдунинг норозилигига сабаб бўлди.
