Роналду Жаҳон чемпионати саралаш босқичларида урилган голлар сони бўйича мутлақ рекорд ўрнатди

Португалия миллий жамоаси ҳужумчиси Криштиану Роналду Жаҳон чемпионати саралаш босқичларида урилган голлар сони бўйича мутлақ рекорд ўрнатди.

ЖЧ-2026 саралаши доирасида Португалия Венгрия билан баҳс олиб бориб, якунда 2:2 ҳисобида дуранг ўйнади. Учрашувда Роналду дубль қайд этди ва саралашдаги голлари сонини 41 тага етказиб олди.

Шу тариқа, у илгари 39 та гол билан рекордчи ҳисобланган гватемалалик Карлос Руисни ортда қолдирди ва эндиликда Жаҳон чемпионати саралашлари тарихи­даги энг яхши тўпурарга айланди.

1. Криштиану Роналду (Португалия) — 41 та гол

2. Карлос Руис (Гватемала) — 39 та гол

3. Лионель Месси (Аргентина) — 36 та гол

4. Али Даеи (Эрон) — 35 та гол

5. Роберт Левандовски (Польша) — 33 та гол

Эслатиб ўтамиз, Роналду ҳозирда Саудиянинг «Ан Наср» клуби шарафини ҳимоя қилиб келмоқда. Томонлар ўртасида тузилган амалдаги шартнома 2027 йилнинг ёзига қадар мўлжалланган.

Насрулло Каримов

Журналист