Роналду ва Месси Тевеснинг хайрлашув ўйинида бир жамоада ўйнаши мумкин
Португалиялик Криштиану Роналду ва аргентиналик Лионель Месси собиқ «Бока Хуниорс» ҳамда Аргентина терма жамоаси ҳужумчиси Карлос Тевеснинг хайрлашув учрашувида бир жамоа сафида майдонга тушиши мумкин.
Foot Mercato маълумотларига кўра, мазкур учрашув 2026 йил декабрь ойида Буэнос-Айресдаги «Ла Бомбонера» стадионида ўтказилиши режалаштирилган.
Тевес Роналду ва Мессини бир жамоада кўриш орзуси борлигини айтган.
«Мен доимо Криштиану ва Леони бир жамоада ўйнаётганини кўришни орзу қилганман. Улар барча даврларнинг энг буюк икки футболчиси. Мен улар билан, айниқса Криштиану билан боғландим. Унга: “Криштиану, хайрлашув ўйинимда сен ва Леони бир жамоада ўйнашингизни хоҳлайман. Бутун дунё бу сеҳрни бир марта бўлса-да кўриши керак”, дедим. У келишига ваъда берди. Леони ҳам кўндириш қийин бўлмади. Иккаласи ҳам розилик берди. Буни катта ҳаяжон билан кутяпман. Ўйин жуда ҳиссиётли ўтиши аниқ», — деди Тевес.
Карлос Тевес 2021 йилда профессионал футболчилик фаолиятини якунлаган.
