Роналду ва Месси бир жамоада ўйнаши мумкин
Португалия терма жамоаси ва Саудиянинг “Ан-Насср” клуби ҳужумчиси Криштиану Роналду вақтинча жамоасини ўзгартириши мумкин. Бу ҳақда talkSPORT нашри хабар бермоқда.
Манбага кўра, Роналду 2025-йилги клублар ўртасидаги жаҳон чемпионатида иштирок этиш учун “Ан-Насср”ни тарк этиш ҳақида ўйламоқда. Унинг саудияликлар билан тузган амалдаги шартномаси мавсум охирида якунига етади.
Қайд этилишича, Роналду “Интер Майами” билан қисқа муддатли шартнома имзолаши ва аргентиналик ҳужумчи Лионель Месси билан бирга клублар ўртасидаги жаҳон чемпионатида қатнашиши мумкин.
Таъкидланишича, 40 ёшли форвард қисқа муддатли шартномаси тугаганидан сўнг яна “Ан-Насср”га қайтишни режалаштирмоқда.
Эслатиб ўтамиз, 2025-йилги клублар ўртасидаги жаҳон чемпионати 14-июньдан 13-июльга қадар бўлиб ўтади.
