Роналду Руи Патрисиунинг фаолиятини якунлаганига муносабат билдирди
Аввалроқ португалиялик дарвозабон 37 ёшида катта футболдан кетганини маълум қилганди.
ФОТО: Getty Images
Португалия миллий жамоаси ҳужумчиси Криштиану Роналду 37 ёшли дарвозабон Руи Патрисиунинг фаолиятини якунлагани ҳақидаги хабарга муносабат билдирди.
«Раҳмат сенга барча ишларинг учун, Руи! Бунақа фаолият билан табриклайман!» — деб ёзди Роналду ижтимоий тармоқларда Патрисиунинг футболчи сифатида ўйинларни якунлагани ҳақидаги постга изоҳ қолдириб.
Лиссабоннинг «Спортинг» клуби тарбияланувчиси бўлган Руи Патрисиу фаолияти давомида Англиянинг «Вулверхэмптон», Италиянинг «Рома» ва «Аталанта» клубларида, шунингдек, БААнинг «Ал Айн» жамоасида ўйнаган.
Португалия миллий жамоаси сафида у 108 та учрашувда майдонга тушиб, Евро—2016 ҳамда УЕФА Миллатлар лигаси — 2018/2019 мавсумлари ғолибига айланган.
Насрулло Каримов
Журналист