Роналду профессионал футболчилик фаолиятини якунлашга қарор қилди
Ҳужумчи Криштиану Роналду «Ан Наср» клубини тарк этиш ва профессионал футболчилик фаолиятини якунлашга қарор қилди. Журналист Бен Жейкобснинг ижтимоий тармоқлардаги маълумотига кўра, 40 ёшли футболчи клуб билан шартномасини узайтирмайди ва 2027 йил ёзида расман фаолиятини тугатишини эълон қилади.
Манбага кўра, «Ан Наср» раҳбарияти Роналду камида яна бир мавсум жамоада қолишига кўндиришга ҳаракат қилмоқда. Агар бу амалга ошмаса, клуб уни Саудия Арабистонида сақлаб қолиш мақсадида умумий эгаликдаги улушини 15 фоизгача ошириш вариантини таклиф қилишга тайёр. Роналду «Ан Наср» билан 2023 йилда «Манчестер Юнайтед»даги шартномаси якунлангач, эркин агент сифатида шартнома имзолаган эди.
Ҳозирга қадар Роналду «Ан Наср» сафида 125 та учрашувда майдонга тушиб, 110 та гол урди ва 22 та голли узатма амалга оширди. Унинг амалдаги шартномаси 2027 йил ёзигача мўлжалланган. Transfermarkt портали футболчининг бозор қийматини 12 миллион еврога баҳоламоқда.
