Роналду профессионал фаолияти давомида 14-марта бир календар йилида 40 тадан ортиқ гол уришга муваффақ бўлди
Португалия терма жамоаси ва “Ан-Насср” клуби ҳужумчиси Криштиану Роналду профессионал фаолияти давомида 14-марта бир календар йилида 40 тадан ортиқ гол уришга муваффақ бўлди. 2025 йил 27 декабрь куни португалиялик футболчи Саудия Арабистони чемпионатининг 11-тури доирасида “Ал-Оҳдуд” жамоасига қарши баҳсда (3:0) дубл қайд этди.
Шу каби натижага Роналду 2010–2018-йиллар, шунингдек 2020, 2021, 2023 ва 2024-йилларда ҳам эришган. Португалиялик футболчининг энг яхши кўрсаткичи 2013-йилда қайд этилган. Ўшанда Роналду бир йил давомида 69 та гол урган.
Маълумот учун, Криштиану Роналду футболчилик фаолияти давомида 1300 та учрашувда майдонга тушиб, 956 та гол ва 260 та голли узатма муаллифи бўлган.
Португалия терма жамоаси сардори Саудия Про лигасининг жорий мавсумида 12 та гол киритган ва тўпурарлар пойгасида жамоадоши Жоау Феликс билан пешқадамлик қилмоқда.
Шунингдек, FIFA Араб кубоги мусобақаси сабабли Саудия Про лигасининг 10-тур учрашувлари 2026 йил февраль ойида ўтказилади. “Ан-Насср” 10 та учрашувдан сўнг 30 очко жамғарган ҳолда Саудия Про лигасида етакчилик қилмоқда. Жамоа энг яқин таъқибчи — “Ал-Хилол”дан 4 очкога олдинда бормоқда.
