Роналду Оқ уйда меҳмон бўлди ва Трампнинг оиласи билан танишди
Португалия миллий жамоаси ва Саудиянинг «Ан Наср» клуби ҳужумчиси Криштиану Роналду Саудия Арабистони валиаҳд шаҳзодаси Муҳаммад бин Салмоннинг АҚШга ташрифи муносабати билан Оқ уйда ташкил этилган тантанали кечки овқатнинг махсус меҳмонларидан бири бўлди. Бу ҳақда ESPN хабар берди.
Манба маълумотига кўра, Роналду АҚШ президенти Дональд Трампнинг оиласи билан танишган. Трампнинг айтишича, унинг 19 ёшли ўғли Баррон узоқ йиллардан бери Роналдунинг ўйинига қойил қолади ва уни шахсан кўргани учун жуда хурсанд бўлган.
«Баррон ва Криштиану танишишди. Афтидан, энди Баррон отасига бироз кўпроқ ҳурмат билан қараётгандек — чунки уларни мен таништирдим», — дея Трампнинг сўзларини келтиради ESPN.
Кечки овқатда, шунингдек, FIFA президенти Жанни Инфантино, Amazon асосчиси Жефф Безос ва тадбиркор Илон Маск ҳам иштирок этган.
