Ronaldu Oq uyda mehmon boʻldi va Trampning oilasi bilan tanishdi
Portugaliya milliy jamoasi va Saudiyaning «An Nasr» klubi hujumchisi Krishtianu Ronaldu Saudiya Arabistoni valiahd shahzodasi Muhammad bin Salmonning AQSHga tashrifi munosabati bilan Oq uyda tashkil etilgan tantanali kechki ovqatning maxsus mehmonlaridan biri bo‘ldi. Bu haqda ESPN xabar berdi.
Manba ma’lumotiga ko‘ra, Ronaldu AQSH prezidenti Donald Trampning oilasi bilan tanishgan. Trampning aytishicha, uning 19 yoshli o‘g‘li Barron uzoq yillardan beri Ronalduning oʻyiniga qoyil qoladi va uni shaxsan ko‘rgani uchun juda xursand bo‘lgan.
«Barron va Krishtianu tanishishdi. Aftidan, endi Barron otasiga biroz ko‘proq hurmat bilan qarayotgandek — chunki ularni men tanishtirdim», — deya Trampning so‘zlarini keltiradi ESPN.
Kechki ovqatda, shuningdek, FIFA prezidenti Janni Infantino, Amazon asoschisi Jeff Bezos va tadbirkor Ilon Mask ham ishtirok etgan.
