Роналду: «Мен португалияликман, аммо ўзимни Саудия Арабистонининг бир қисми деб биламан»
Саудия Арабистонининг «Ан-Насср» клуби ҳужумчиси Криштиану Роналду мамлакатга бўлган муносабати ҳақидаги сўзлари билан мухлислар эътиборини тортди. Португалиялик футболчининг баёноти клубнинг «Нефтчи»га қарши учрашувидан сўнг ижтимоий тармоқларда яна эълон қилинди. Бу ҳақда Gulf News нашри хабар бермоқда.
Манбага кўра, «Ан-Насср» 12 октябрь куни Осиё Чемпионлар Лигаси Элит босқичида Фарғонанинг «Нефтчи» клубини 3:1 ҳисобида мағлуб этди. Учрашувда битта гол урган Роналду ўйиндан сўнг Саудия Арабистони байроғи туширилган шарфни елкасига ташлаб, мухлислар билан ғалабани нишонлади. Шундан сўнг клуб португалиялик ҳужумчининг «Мен португалияликман, аммо ўзимни Саудия Арабистонининг бир қисми деб биламан», деган сўзларини эълон қилди.
Аслида, Роналду ушбу фикрни 2025 йил июнь ойида «Ан-Насср» билан шартномасини узайтирганидан кейин билдирган эди. Клуб унинг аввалги баёнотини Саудия Арабистонига бўлган муносабатини акс эттирувчи сурат билан қайта улашди. Роналду мамлакатда ўзини қулай ҳис қилиши ва унинг ривожланишига ҳисса қўшишни исташини ҳам таъкидлаган.
Маълумот учун, 41 ёшли Криштиану Роналду 2023 йил январь ойидан буён «Ан-Насср» сафида тўп сурмоқда. Унинг клуб билан амалдаги шартномаси 2027 йил ёзигача мўлжалланган. «Нефтчи» дарвозасига урилган гол португалиялик футболчининг фаолиятидаги 981-гол бўлди. Энди унга 1000 та гол маррасига етиш учун яна 19 та гол керак.
