Роналду фаолиятидаги 36-мувваффақиятсиз пенальтини амалга оширди
Саудия Арабистони Про-лигасининг 24-тури доирасида бўлиб ўтган «Ал Файҳа» ва «Ан Наср» (1:3) жамоалари ўртасидаги учрашувда меҳмонлар форварди Криштиану Роналду ўз фаолиятидаги 36-мувваффақиятсиз пенальтини амалга оширди. Бурайда шаҳридаги «Қирол Абдулла Спорт Сити» стадионида кечган баҳсда португалиялик юлдуз 11 метрлик жарима зарбасидан фойдалана олмади.
Учрашувнинг 11-дақиқасида белгиланган пенальтини Роналду дарвозадан ташқарига йўллади. Маълумот учун, Криштиану ўз фаолияти давомида жами 218 бор нуқтага яқинлашган. Мазкур ўйинда ҳужумчи 81-дақиқада захирага олинди, унинг жамоаси эса иродали ғалабани қўлга киритди.
Саудия Арабистони чемпионати якунланишига 10 тур қолганида «Ан Наср» 24 ўйиндан 61 очко жамғарган ҳолда турнир жадвалида пешқадамлик қилмоқда. Иккинчи ўринда 59 очко билан «Ал Ахли» бораётган бўлса, кучли учликни 58 очкога эга «Ал Ҳилол» якунлаб турибди.
