Ronaldu faoliyatidagi 36-muvaffaqiyatsiz penaltini amalga oshirdi
Saudiya Arabistoni Pro-ligasining 24-turi doirasida bo‘lib o‘tgan «Al Fayha» va «An Nasr» (1:3) jamoalari o‘rtasidagi uchrashuvda mehmonlar forvadi Krishtianu Ronaldu o‘z faoliyatidagi 36-muvaffaqiyatsiz penaltini amalga oshirdi. Burayda shahridagi «Qirol Abdulla Sport Siti» stadionida kechgan bahsda portugaliyalik yulduz 11 metrlik jarima zarbasidan foydalana olmadi.
Uchrashuvning 11-daqiqasida belgilangan penaltini Ronaldu darvozadan tashqariga yo‘lladi. Ma’lumot uchun, Krishtianu o‘z faoliyati davomida jami 218 bor nuqtaga yaqinlashgan. Mazkur o‘yinda hujumchi 81-daqiqada zaxiraga olindi, uning jamoasi esa irodali g‘alabani qo‘lga kiritdi.
Saudiya Arabistoni chempionati yakunlanishiga 10 tur qolganida «An Nasr» 24 o‘yindan 61 ochko jamg‘argan holda turnir jadvalida peshqadamlik qilmoqda. Ikkinchi o‘rinda 59 ochko bilan «Al Ahli» borayotgan bo‘lsa, kuchli uchlikni 58 ochkoga ega «Al Hilol» yakunlab turibdi.
