Роналду “Ал-Наср”ни сотиб олиши мумкин
Криштиану Роналду Саудия Арабистонининг “Ал-Наср” клубини сотиб олиш бўйича йирик инвестицион лойиҳада иштирок этиши мумкин. A Bola маълумотига кўра, португалиялик футболчи “Милан” эгаси ва RedBird раҳбари Жерри Кардинале билан биргаликда клубни харид қилиш таклифини тайёрламоқда. Консорциум таркибига яна “Ал-Наср”нинг собиқ президенти Иброҳим Ал-Муҳайдиб, Муҳаммад Ал-Хурайжи ва Шараф Ал-Харири ҳам киргани айтилмоқда.
Хабарларга кўра, гуруҳдаги беш инвесторнинг ҳар бири лойиҳа учун қарийб 100 миллион доллар ажратиши режалаштирилган. Шу тариқа, дастлабки босқичда клубга жами 500 миллион долларга яқин сармоя киритилиши мумкин. Sportitalia эса Кардинале томони “Ал-Наср” бўйича воситачилар орқали дастлабки алоқаларни бошлаганини, бироқ музокаралар ҳозирча якуний босқичдан узоқда эканини таъкидламоқда.
“Ал-Наср”нинг мулкдорлик тизимида ҳам катта ўзгаришлар кутилмоқда. PIF 2023-йилда клуб акцияларининг 75 фоизини ўз назоратига олган эди. 2026-йил августда эса Саудия Спорт вазирлиги қолган 25 фоизлик улушни ҳам PIF тасарруфига ўтказиш жараёни бошланганини маълум қилди. Саудия ОАВларига кўра, кейинги босқичда клубнинг катта қисми хусусий инвесторлар учун сотувга чиқарилиши мумкин.
Агар битим амалга ошса, Роналду “Ал-Наср”даги оддий футболчи мақомидан клубнинг асосий инвесторларидан бирига айланиши мумкин. Португалияликнинг “Ал-Наср” билан амалдаги шартномаси 2027-йилгача мўлжалланган. Бундан ташқари, Роналду футбол бизнесига аллақачон кириб келган — 2026-йил февралда у Испаниянинг “Алмерия” клубидан 25 фоиз улуш сотиб олган.
