Роналду 2022-йилда “Челси”га ўтиши мумкин эди
Криштиану Роналду 2022-йилда “Манчестер Юнайтед”даги иккинчи даври вақтида “Челси”га ўтишга яқин бўлган. Лондон клуби раҳбарияти португалиялик юлдузни таркибга қўшиб олиш имкониятини жиддий кўриб чиққан. Бу ҳақда The Athletic хабар бермоқда.
Манбага кўра, ўша пайтда “Челси” хўжайини Тодд Бёли Роналду агенти Жорже Мендеш билан Португалияда шахсан учрашган. Музокаралардан сўнг Бёли трансфер ғоясига катта қизиқиш билдирган ва португалиялик ҳужумчини Лондонга олиб келишни истаган.
Бироқ “Челси”нинг ўша пайтдаги бош мураббийи Томас Тухель бу трансферга қатъиян қарши чиққан. Немис мутахассиси Роналду жамоага қўшилишига бир неча бор розилик бермагач, трансфер амалга ошмай қолган. Кейинчалик португалиялик футболчи “Манчестер Юнайтед”ни тарк этиб, Саудия Арабистонининг “Ал-Насср” клубига ўтди.
Маълумот учун, Роналду “Манчестер Юнайтед”га 2021-йилда қайтган ва клубни 2022-йил ноябрида тарк этган. 2023-йил январидан буён у “Ал-Насср” сафида тўп суриб келмоқда.
