Ronaldu 2022-yilda “Chelsi”ga o‘tishi mumkin edi
Krishtianu Ronaldu 2022-yilda “Manchester Yunayted”dagi ikkinchi davri vaqtida “Chelsi”ga o‘tishga yaqin bo‘lgan. London klubi rahbariyati portugaliyalik yulduzni tarkibga qo‘shib olish imkoniyatini jiddiy ko‘rib chiqqan. Bu haqda The Athletic xabar bermoqda.
Manbaga ko‘ra, o‘sha paytda “Chelsi” xo‘jayini Todd Boeli Ronaldu agenti Jorje Mendesh bilan Portugaliyada shaxsan uchrashgan. Muzokaralardan so‘ng Boeli transfer g‘oyasiga katta qiziqish bildirgan va portugaliyalik hujumchini Londonga olib kelishni istagan.
Biroq “Chelsi”ning o‘sha paytdagi bosh murabbiyi Tomas Tuxel bu transferga qat’iyan qarshi chiqqan. Nemis mutaxassisi Ronaldu jamoaga qo‘shilishiga bir necha bor rozilik bermagach, transfer amalga oshmay qolgan. Keyinchalik portugaliyalik futbolchi “Manchester Yunayted”ni tark etib, Saudiya Arabistonining “Al-Nassr” klubiga o‘tdi.
Ma’lumot uchun, Ronaldu “Manchester Yunayted”ga 2021-yilda qaytgan va klubni 2022-yil noyabrida tark etgan. 2023-yil yanvaridan buyon u “Al-Nassr” safida to‘p surib kelmoqda.
