Роналдиньо “Ravenna”га етиб келди ва янги клубдаги мақсадини айтди
Бразилия футболи афсонаси Роналдиньо Италиянинг “Ravenna” клубидаги янги фаолиятини бошлаш учун шаҳарга етиб келди. 46 ёшли собиқ футболчи клуб билан июн ойида келишувга эришган ва жамоа лойиҳасининг бир қисмига айланган. “Ravenna” айни пайтда Италия C Сериясида иштирок этади.
“Бу ерда, дўстларим ёнида бўлганимдан жуда хурсандман. Жамоада ҳаммаси яхши бўлишига умид қиламиз. Мен бу ерга ёрдам бериш, бошқа футболчиларни руҳлантириш, ажойиб мавсум ўтказиш ва ғалаба қозониш учун келдим”, — деди Роналдиньо. Унинг айтишича, дўстлик ва футболга бўлган иштиёқ уни ушбу лойиҳага қўшилишга ундаган.
“Ravenna” президенти Иняцио Чиприани Роналдиньонинг келиши наfaқат жамоага, балки бутун шаҳарга катта қизиқиш уйғотишини кутмоқда. Бразилиялик афсона клубга инвестор сифатида ҳам қўшилган. У футболчи сифатида расмий рўйхатдан ўтказилган бўлса-да, майдонга айнан қачон ва нечта учрашувда тушиши ҳозирча аниқ эмас. Клуб раҳбарияти уни камида бир марта майдонда кўришга умид қилмоқда.
Маълумот учун, Роналдиньо сўнгги профессионал учрашувини 2015 йилда Бразилиянинг “Fluminense” клуби сафида ўтказган. У 2002 йилда Бразилия терма жамоаси билан жаҳон чемпиони бўлган, 2005 йилда эса “Олтин тўп”ни қўлга киритган. Энди 46 ёшли афсона “Ravenna” сафида яна бир бор майдонга тушиш имкониятини истисно қилмаяпти.
